“Seguimos dando pasos na construción do sector da oliveira en Galicia, e para isto é fundamental a colaboración entre produtores/ as, institucións e centros de ensino como é o do Ribeiro”, explica o Presidente da APAAG, Alfonso Rodríguez Udías
Ribadavia, 30 de marzo de 2023
A Asociación de Produtores de Aceite e Aceituna de Galicia e o Centro de Formación Profesional IES O Ribeiro, asinaron esta mañá un convenio de colaboración, co obxectivo de fomentar o coñecemento no campo da oliveira en Galicia, e a colaboración para novas actividades. Este acordo, é froito do traballo conxunto que as dúas entidades veñen levando a cabo nos últimos meses, e que se concreta en colaboracións en actividades formativas, divulgativas e tamén proxectos conxuntos.
O convenio foi asinado entre o Presidente da APAAG, Alfonso Rodríguez Udías e a Directora do centro, Ana Belén Álvarez Álvarez.
O Centro de Formación Profesional IES O Ribeiro, imparte o ciclo de elaboración de aceites e viños, e, en palabras de Alfonso Udías, “para a Asociación de Produtores é un valor importante ir da man deste centro de ensino xa que permítenos traballar conxuntamente na transferencia do coñecemento no sector oliveiral, así coma afondar no estudo e promoción dos Aceites de Oliva Virxe Extra galegos.”
As accións máis destacadas a levar a cabo son, entre outras:
- Realización de charlas divulgativas relacionadas co sector oleico.
- Xornadas de formación ou prácticas en plantacións de oliveiras da APAAG.
- Achegar o sector dos AOVEs galegos ao alumnado do centro.
- Apoio e asesoramento en cuestións técnicas.
- Colaboración da difusión da oferta formativa entre os asociados.
- impulso e desenvolvemento de proxectos conxuntos.
